Sykkel som framkomstmiddel

Tre år etter kjem Lesesenteret tilbake til Metochi på Lesbos for å arbeide og skrive. Studiesenteret Metochi er drive av Universitetet i Agder, men er opprinneleg ein del av klosteret Limonos. Studiesenteret ligg ca 3 km frå "byen" Kalloni, og 4 km frå stranda Skala Kalloni, ganske øde med grusvegar i kryss og tvers. Bussen kan køyre nesten fram, men tåler ikkje å møte ein bil. Vegen fram til Metochi er skilta med "håndskrivne" skilt, sjå under. Det er fint med skilt, for det er fleire stader mogleg å ta feil veg. Å leie syklar kosta 30 euro  veka.

I siestaen midt på dagen sykla dei fleste ein tur til Kalloni eller til Skala eller begge delar. Fint å bade i lagunen, langgrunt og lunka vatn. Sykkel var det beste alternativet for denne turen. Ein dag prøvde eg meg på ei anna rute, men snudde nokså fort, flat grusveg utan eit tre som skygga, det blei for varmt. Lesbos er ganske stor, og det er lite trafikk på vegane (også dei asfalterte), så ein sykkeltur rundt øya er mogleg. Men kanskje ikkje så kjekt å suse forbi flyktningar som traskar langs vegen.

Denne gongen hadde vi fylt opp koffertane våre med saker og ting til flyktningane som reiser over øya, frå Tyrkia til Europa. Eg hadde med to soveposar og klede som blei gitt til Agkalia, ein organisasjon som organiserer flyktingehjelpen i Kalloni, som er ein stad på vegen for dei som kjem i land nord på øya, og skal vidare til Mytilini for å ta båten til Aten.

Bilete frå klosteret Limonos.