Førebuingar til sykling i Norge.

Å sykle frå hotell til hotell i Noreg er faktisk ei ny oppleving for oss, etter mange år i Mellom- og Sør-Europa. Det er mykje nytt: Veret, det kuperte terrengent, å frakte bagasjen sjølv og å bruke eigne syklar. Nytt for oss er det også å kjøre bil fram til startstaden. 

Dette nye medførte fleire val: 

Dersom me skulle bruke dei lette, "vanlege" syklane våre, måtte minst ein av oss montere bagasjebrett. Sjølv om det bare var to overnattingar med sykkel, ville det truleg vere mykje å sykle med all bagasjen på ryggen. 

Å bruke el-syklane ville vere ein risikosport for Han der, el-sykkelen hans ville truleg ikkje ha god nok rekkevidde. Ein kikk på kartet viste at seint dag 1 (55 km) var det ei saftig stigning. - Då dette gjekk opp for Han der, blei turen døypt til Dødsmarsjen.

Slik kunne me ikkje ha det. Lille rektor kom med eit veldig godt forslag: Han der kunne låne Pilfinnar sin el-sykkel. Den hadde god rekkevidde. Då Han der hadde tenkt litt over det, kom han til at han like gjerne kunne kjøre seg ny el-sykkel sjølv. Dette ville gi han ein sykkel som kunne gjere Dødsmarsjen om til ein parademarsj, og dessutan ville han ein gong for alle få slutt på det der at Hu der hadde meir el-kraft og sykla frå han. Som sagt så gjort: Ny Raymon el-sykkel kom raskt i hus, tidsnok til eit par prøveturar før Telemark. På el-syklane er det bagasjebrett, og med våre eigne to sykkelvesker og lån av eitt sett frå Lille rektor, har vi meir enn nok lastekapasitet, både til regntøy og mat vi må ha med oss. 

Prøvetur 1 var bytur i Sandnes sentrum ++ i regn (brukte 10% av batterikrafta), prøvetur 2 var Austrått - Bergsagel - Hommersåk- Austrått, 42 km. Då var det gått 40% av elkrafta på Hu der sin sykkel, litt meir på Han der sin. Det bør halde.

I dag har me kjørt Hunnedalen, Sirdal, Suleskar, Setesdal og over fjellet igjen til Telemark. Dette er delar av vegen Ranveig og Marie sykla då dei sykla frå Sandnes til Gol ca år 2000, eller litt før det. Dei hadde i tillegg 800 m rett opp frå Lysebotn i regn før dette, og dei var begge i tenåra. Eg er så imponert over det dei klarte, med relativt enkelt utstyr. Det er stigningar i masse, og lange fjellstrekk utan vidare ly. Det var nok mindre trafikk då, for i år var det stor trafikk, spesielt Suleskar, men likevel.

Me køyrde alle småvegar som fanst, og vegen verka ganske lang, men me fekk også inspisert vegen me skal sykle i morgon. Konklusjon: Me må ha med niste.

 

Sykle fra hytta og heim 57,2 km

Å sykle til eller frå hytta har vore eit mål. Hu der har nådd dette målet. 

Nogen rydda hytta og kjørte bilen heim, medan Hu der heiv seg på sykkelen. Kuling nordavind lørdag hadde blitt til lett bris frå sør søndag. Dagen var grå, det var 12 grader, og ingen konkurrerande  planar.

Derfor blei det sykkeltur på 57,2 km frå Moivika til Austrått. Turen tok 3 timar og 40 min, hogd over havet var frå 10 meter til 75, det er meir kupert enn ein skulle tru. Det var lett medvind og det regna den siste timen. Men det var godt å sykle.

Beskrivelse av ruta, dersom andre vil prøve:

Moivika - riksveg 44 nordover til Sirevåg - inn til Sirevåg (3km), til høgre like etter butikken (Svanes) og rett fram inn på turvegen som går til Ogna. Gjennom skogen til kafeen i svingen (6 km), men like før svingen til venstre inn på grusveg som går på vestsida av jernbanen. Følg denne forbi Ogna stasjon og ta inn på Nordsjøvegen, som er skilta derfrå. Nordsjøvegen tar deg ut mot havet (7km) og gjennom Ogna Camping, deretter langs Hitlertennene (9 km) til Brusand. Ved brua på Brusand (10 km) kryssar ein vegen, syklar inn bak Coop og følgjer Nordsjø sykkelrute i retning Stokkelandsmarka og Haugstadskogen. Nå er ein inne på ein flott, til dels ny sykkelsti som går gjennom heile Hå kommune, frå Sirevåg til Garborg. 

Vegen går gjennom stasjonsby etter stasjonsby: Vigrestad, Varhaug og Nærbø (ikkje gjennom sentrum), heile tida på sykkelsti. Etter Varhaug slutta eg å følgje Nordsjø sykkelrute, den svingar ned mot havet - sikkert fint, men ikkje i dag! 

Skiltet for Time kommune kjem, og sykkelstien sluttar brått (33 km).  Riksveg 505 har ikkje sykkelsti eller sykkelfelt før han kjem til Time kyrkje (39 km). Det er ein strekning med ein del trafikk, m.a. vegen mellom Bryne og Undheim går der. Stor kontrast til Hå kommune. 

Men når Time først serverer sykkelsti, er han god på austsida av Frøylandsvatnet til Kverneland (46 km).

Vidare sykla Hu der over Orstad, Foss-Eikeland, Ganddal, Hovemarka, Tronsholen, Høyland kyrkje Kyrkjevegen og heim. 

Tilfredsstillande å ha tatt turen. I finare ver og med selskap hadde nok pausane blitt fleire og lengre, men fint å sjå at det lar seg gjere å sykle denne turen. - Når det blir nordavind igjen, kan han syklast motsatt veg. 

I tettbygde strok - men lite bilveg - Rundtur Sandnes - Stavanger

Det er bygd mykje bra av gang- og sykkelvegar dei seinaste åra. Vi hadde ein fin runde i dag, med innlagd sosial vaffelstopp i Våland kolonihage, og fantastisk fin kunstutstilling på Rogaland kunstmuseum - Kitty Kielland. Runden var på 42 km, kart nede på sida.

Det herlege, utan trafikk, starta på Lura, sykkelstien langs Gandsfjorden blir vi aldri leie av. Sidan vi skulle til Tjensvoll, tok vi av ved Hillevåg, kryssa bussvegen (Rv 44) og Kildensenteret og kom opp til sjukehuset og vidare til Våland kolonihage på småvegar. I Våland kolonihage var Anton med foreldre, ein liten stopp der.

Vi sykla ut av kolonihagen like ved inngangen til Ryfast-tunnelen, over motorvegen på gangbru, og på sørsida av Mosvatnet og rundt det til kunstmuseet.

Tun på Kvalbein - Kitty Kielland

Kitty Kielland-utstillinga blir ståande til litt utpå hausten. Eg anbefaler alle, med eit snev av kunstinteresse, å ta turen innom. Mange flotte maleri, mange frå Jæren, samt kunsthistorie og litt kulturhistorie på veggene. Og dekor for Egersund Fayanse, bekkeblomst av Kitty Kielland.

Turen gjekk vidare gjennom det store utstillingsområdet til Stavanger forum, ned til gangvegen som går langs bekken gjennom Madla (Madlabekken?) til Møllebukta. Der var det vikingmarknad og mykje folk. Vi kom oss forbi, sjølv om bilane også hadde parkert i sykkelstien. Turen langs Hafrsfjord er også flott, og sykkelstien har utmerka kvalitet. Derfrå over Grannes til "Rumagkrysset" ved motorvegen, til Sørnes og igjen: Over ein sykkelveg i det grøne til Forus. På Forus er det mange sykkelvegar å velje mellom, og det er gjort ein del arbeid med det som sikkert skal bli sykkel-motorvegen. - Vi kryssa motorvegen ved kollektivbrua ved Statoil, og derfrå var det inn på diverse bilvegar heilt til vi kom opp Austråttvegen og kunne sykle på gang- og sykkelvegen nedanfor Austrått og Høyland skole.

Ein kjekk tur med fine sykkelstiar!

Rundtur Sandnes - Hommersåk - Stavanger - Sandnes med båt 32 km

Sykkelstien mellom Austrått og Hommersåk er langt frå ny, men veldig bra, godt skild frå biltrafikken, det tar 40 min i roleg tempo til Hommersåk. Søndag går båten mellom Hommersåk og Stavanger kl 11.30, (og kl 08.00, 13.45, 15.45, 17.30 og 19.40) den tar syklar gratis, og passasjeren betaler Kolumbus minstetakst. Etter ein fin tur innom hyttestadane Usken, Skjølsvik og Uskekalven, er ein i Stavanger etter ein halvtime.

Frå kaien i Stavanger kan ein sykle opp Klubbgata og finne skiltinga til Nordsjøruta, som går ut Lagårdsveien, over brua ved Paradis, ut Paradisveien, Consul Sigval Bergesens vei (som er stengd for biltrafikk på grunn av bygging) og inn på sykkelstien langs dobbeltsporet heilt til Lura. Derfrå var det vanleg Strandgata, Austråttbakken og sykkelsti over Iglenyr heim. Strekket frå Stavanger var 19,6 km. Ein flott tur som kan anbefalast, særleg ein soldag i mai. Dersom ein har kjekk slekt i Hommersåk, kan ein også overnatte og ta dette over to dagar.

Når det er varmt i Norge er det fint å sykle i sjøkanten.

ØNoen badar, noen går inn, noen sit i skuggen, vi svalar oss med ein frisk sykkeltur langs ein eller annan sjøkant. 

For eksempel 

1. Sandnes -Dale tur retur, kort kveldstur. Biletet under er frå Hana, sjøspeidarane. Bading i Holmavika mulig. Ta med mat og drikke. Butikk i Aspervika. 

2. Langs dobbelsporet Sandnes - Stavanger. Bading på Vaulen og deromkring. Kan utvidast med bytur i Stavanger, vidare over Stokka til Madla, langs Hafrsfjord, Sørnes, Forus og til Sandnes. Ein ganske lang tur. Eller ein kan ta toget tilbake til Sandnes.

3. Tungenesruta frå Tungenes fyr til Tanangerbrua. Kafe på fyret  mellom 12 og 16 om sommaren og på Viste strandhotell. Veldig fin på veg med utruleg lite trafikk, eit par snarvegar på sti, Vistehola, Vistnestunet og fyret som attraksjonar. Denne ruta kan gjerast til liten rundtur om Randaberg sentrum eller stor rundtur om Stavanger sentrum, frå Kvernevik langs Hafrsfjord og inn til byen, Nordsjøruta derfrå til Mekjarvik og Tungenes. Bading på Sande, Viste eller kor som helst. 

4. Hafrsfjord rundt: Sola ruinkyrkje - Risavika - Tananger - Sunde - Madla - Røyneberg -Joa - Sola 31 km, flatt. Kan sjå på Sola ruinkyrkje, Tjora gamle kyrkjegard ( som me ikkje fann), flammen i Risavika, det går tursti utanfor industrianlega, Sverd i fjell. Bading på Sunde og i Møllebukta, eller på Solastrand.

Under idyll i Tananger.

5. Vidare kan tur 4 forlengjast langs Solastrand til Ølberg, Vigdel eller bli ei sløyfe rundt flyplassen om Sola sentrum. Langs stranda er det ein fin og flott sykkelsti (bilete) som dessverre brått tar slutt ved Solastrand Gård. Derfrå må ein sykle i vegen i trafikken som kan vere nokså stor når det er rushtrafikk. I søndre del av stranden kan ein ta inn til Domsteinane og kikke på dei (bilete). 

Sykkelmotorveg kan kome!

Stavanger Aftenblad har i dag eit stort oppslag om sykkelmotorvegen som nå blir planlagd mellom Sandnes og Stavanger. Overskrifta er 800 millionar for fem minutt, Dei framstiller det slik fordi ein syklist frå Stavanger til Forus kjem fem minutt fortare fram med ein slik veg i staden for slik han syklar i dag. Dei gløymer betra sikkerheit for syklistane, færre bilar på vegane og mindre behov for vegar og helsegevinst for syklistar. Eg synest motorvegen ser bra ut, men er ikkje sikker på om han kjem så raskt at eg kan bruke han til og frå jobb før eg blir pensjonist.

Film om dette, og reportasje, med ganske mange dumme kommentarar under, akkurat det Aftenbladet legg opp til med overskrifta. Dei bit på!

Herlig, herlig langs sjøen Sandnes - Stavanger

Laurdag med god temperatur, sol og nesten stille. Tidleg føremiddag i Vågen, Sandnes. Havblikk og stille i byen. Hanapiren i bakgrunnen. 

Relativt greit med lite trafikk på Norestraen, til Lura og ned til sykkelvegen langs dobbelsporet frå Lura og nordover mot Stavanger, Det var fantastisk flott. 

Ein pause på Ostehuset ved Viking Stadion med scones og kaffi. Herlig, 

Vi prøvde den tøffe brua over jernbanen i Hillevåg, deretter snudde vi og sykla tilbake til Sandnes same veg vi kom. Planen var opprinneleg å sykle til Stavanger, skjære inn og ta ein annan veg tilbake, Sørmarka eller Hafrsfjord. Men når du syklar og håper det ikkje skal ta slutt, kva gjer du då: Snur og syklar tilbake same vegen tilbake. - Og kva oppdaga vi: Sykkelbrua over vegen som går ned til Viking Stadion, like ved Jåttåvågen stasjon, var åpna. 

Sykkelbrua over E39 ved Statoil Forus åpna

E

Endeleg, eit halvt år forseinka, åpna gang-, sykkel- og bussbrua over E39 på Forus. Andre dag, men alt full trafikk. Brua har kosta 140 millionar kroner, og går rett inn i sykkelvegnettet. 

På Forus er det elles store endringar og mykje bygging. Vidare på min veg nordover kom eg inn på ein riktig brei sykkelveg som munna ut i den gamle snarvegen til Sørnes, Sola. Hurra for nye sykkelvegar!!!

Har sykla til jobben fleire gonger over den nye brua. Under ser vi brua frå vest, du syklar ein flott allé før du syklar over brua. 

Planetstien Sandnes

Lørdagens kosetur gjekk langs Planetstien. Den begynner nord i Sandvedparken ved Mega, og går langs Storånå gjennom parken (som er 3,6 km), vidare rundt Stokkelandsvatnet, der dei ytste planetane ligg, m.a. Neptun. Planetmodellane er plassert innbyrdes i rett avstand i målestokken 1:1milliard, og heile løypa er 5,95 km. Sjå kart i lenka over.- Kvar planet er markert med ei støtte, slik som Neptun på biletet.

Etter Stokkelandsvatnet sykla vi opp Kleivane, som har fått god gjennomgåande veg til Austrått fordi Sandnes tomteselskap skal byggje 500 bustader der.

Rundturen Austrått - Sandnes - Gandal - Høyland - Kleivane - Austrått var 15 km. Kan vere ein flott tur med barn, mykje å sjå, og nesten ikkje på bilveg. 

Igjen lagar dei syklar på Ganddal.

I oppveksten min på 1960-talet var det bare ein type syklar som var aktuelle, DBS. Syklane var laga på Sandnes på Øglænds sykkelfabrikk, seinare på Kvål. Kortreist, lokalt og eit eksempel på lokalt initiativ. Nokre modellar her også. Men tidene skifta, Øglændarvingane selde aksjane sine til eit svensk firma, Monark i 1989, og sykkelfabrikken blei etter kvart lagd ned. Det var for dyrt med norsk arbeidskraft i konkurranse med Austen. Men ennå fins salsapparatet til DBS, Cycleeurope i Sandnes.

Men nå blir det likevel laga syklar på Kvål, der den siste DBS-fabrikken låg. Ådne Orstad har laga ei bedrift som set saman syklar ved hjelp av ferdige delar, Sykkellaboratoriet. Det spesielle er at kvar sykkel er unik, spesialtilpassa kroppen til kjøparen. - Det morosam er at Øglænds sykkelfabrikk starta på same måten i 1892, med å setje saman sykkeldelar dei fekk frå Tyskland (Hengstberg) og USA (The World), før sykkelfabrikken i Langgata i Sandnes blei opna i 1906. - Men Øglænd sine syklar var neppe spesialtilpassa kjøparen!

Rundtur Lura - Stavanger - Madla - Forus - Lura nesten bare på sykkelsti

Utsikt over Gandsfjorden mot aust

Laurdag 24. november kl. 12.15 - 16.15 var det opphaldsver med solgløtt, 8 - 9 grader og nesten vindstille. Sykkelen hadde stått i ro i garasjen lenge, batteriet på lykta og sykkelcomputaren var utlada, men kva gjorde vel det? Ut på tur før regnet kjem igjen! TUR! Ikkje transport til jobb eller treningsrunde.

Vi fann ein flott runde på ca 40 km, nesten alt på sykkelsti, eigen sykkelveg eller i lite trafikkerte gater. Veldig bra. Vi ser bort frå strekket vi måtte ta til og frå, langs Nordestraen, det er tragisk at det ikkje er blitt betre der.

I forklaringa bruker eg namn frå sykkelkartet for Nordjæren. Første delen av turen er for ny til å vere med på kartet, men han går langs jernbanen.

Velodromen over Tjensvollkrysset, bare for mjuke traffikantar

Forklaringa begynner på Lura, vi sykla Gamlevegen mot Lurahammaren frå nord. Til høgre ned Lurastø,  tok undergangen under jernbanen og sykla nordover på sykkelstien mellom jernbanen og Gandsfjorden. Vi passa på å nyte dette, det var bare flott. Heldt deretter til høgre etter Mariero stasjon, og sykla gjennom Vaulen badeplass, sjølv om merkinga viser på "innsida" av jernbanesporet akkurat der.

Steinsetting ved Møllebukta i Hafrsfjord

Det går an å ta seg ein bystopp i Stavanger, men vi sykla over gangbrua over Lagårdsveien, og kom inn på Indre Ring over Våland, passerte det gamle sjukehuset og Arkeologis museum. Ved Mosvatnet heldt vi til høgre og sykla Madlaruta. For første gomg sykla vi på den nye sykkelvelodromen over Tjensvollkrysset, sjå bilete, og vidare på brei sykkelveg til Madlakrossen.

Frå Madlakrossen tok vi nordover igjen, Madlaveien til Møllebukta, og inn på ny sykkelrute Hafrsfjordruta, som er nydeleg steinsett ut mot fjorden, sjå bilete.

I neste rundkjøring sykla vi sykla sørover over Grannessletta, ved Sørnes følgde vi skilting mot Forus (Sørmarkruta), under Nesbuvegen og inn på snarvegen mellom Sørnes og Forus som berre er for syklistar, fotgjengarar og rulleski (vi møtte to). På Forus skjer det store omleggingar heile tida, men det kjem til å bli veldig flotte forhold for syklistar på nordlege Forus. Litt verre var det i området ved Tvedtsenteret/ Elkjøp. Men når det var passert, var det fint langs Svanholmen og Vassbotnen. Endå betre blir det nå kollektiv/sykkelbrua over E39 blir ferdig (forsinka frå desember 2012 til vår 2013).

Vi sykla over E39 ved IKEA, på venstre side av RV44, og Stavangervegen retning Lura til slutt. Heile tida på fortau/sykkelsti. (Kaffe og dessert på Lura Turistheim passa godt før vi sykla gjennom trafikken på Nordestraen heim til Austrått.)

Nedlagd fabrikk ved sykkelstien på Figgjo

I Hellas såg vi mange forlatte fabrikkbygningar. Slike har vi ikkje i Norge, tenkte eg. Men eg tok feil. Ved sykkelstien mellom Sandnes og Ålgård ligg rønna etter Figgjo trikotasjefabrikk, DFU, der dei laga m.a. badedraktar. Her er ein liten film om DFU. I sommar melde Stavanger Aftenblad at det skulle bli bustader der. Ikkje så originalt i desse tider, men bygget er eigentleg staseleg, og staden det ligg på er nydeleg, så det kan bli bra bustader.

Bilete og tekst er laga med Blogger for Iphone!


Vi har forlatte bygg i Sandnes også

Nordsjøruta Sandnes - Sola - Bore + Kleppe og heim 54 km

Her er dagens rute på Runkeeper.

Vi fann skilta for Nordsjøruta, versjon 1B, på Stangeland i Sandnes, "bak rådhuset". I staden for å sykle på sykkelsti langs trafikkert veg over Soma, tok Nordsjøruta oss gjennom byggefelta på Stangeland, over rv. 44 til Malmheim, langt strekk på grusveg utan trafikk. Ut på Jutlandsvegen, også med lite trafikk, deretter over myrene på KIllinglandveien - litt søndagstrafikk der, og ut til sjøen: Ølberg, Vigdel og Hellestø. Veret blei bare betre og betre, og Nordsjøruta var godt skilta og lett å finne. Over i Klepp var skiltinga ikkje like god, men lokalkjennskap hjelpte: Sele, over hengebrua til Bore, ein tur ned i sanddynene, frå Bore mot Kleppe. Ved vegen til Horpestad sa me farvel til Nordsjøveien og sykla til Kleppe, og derfrå heim til Sandnes.

Nordsjøvegen er framleis ikkje den raskaste vegen mellom to punkt, men svært fin og opplevelsesrik. Ved Vigdel passerer han helleristningar, vi syklar på stranden osv. - Hadde "the missing link" av vegen langs stranden vore klar, hadde det vore endå finare, men det skal kome: Til Aftenbladet sitt oppslag om dette.

Mange blide folk å sjå langs vegen i fint ver. Syklistar, joggarar, folk som gjekk og tålmodige bilistar.

Første sykkeltur 2012

Yr, grått, vondt i rumpa, 36 km t/r Austrått - Kleppe, herrrrlig! Og 10 grader og nesten vindstille.
Klepp har feid sykkelstiane, flott, laus grus mange stader i Sandnes kommune. 

Sjøvegen til Hommersåk

Kvifor ta kortaste veg til Hommersåk, når ein har tid til ei flott oppleving?

1. Den alltid kjekke vegen langs Gandsfjorden ved dobbelsporet. Nå kan vi vegen og syklar ikkje feil, sjølv om det manglar merking her og der. Ettersommar med geitrams, blåklokke, rød- og kvitkløver og mange andre blomar. Naturen pyntar det fint!
2. Tall Ship Race - båtar i Stavanger, og mange folk - interessant.
3. Hurtigbåt Stavanger - Uskekalven - Stølsvik - Sjølvik - Usken - Hommersåk  - Å sjå plassar som eg ikkje visste om, å sjå på alle folka som skal i land med pikk og pakk, å vere på fjorden, flott ein sommardag.

Rundturen Austrått - Sandnes - Stavanger - Hommersåk - Austrått: 33 km sykling, 35 min. i båt.

Lang sykkeltur med to ferjer - 75 km

Inspirert av Rigmor Bjørgo, kom me på at det går an å reise med ferja på søndagstur.

Forsandbrua

Me sykla på nasjonal sykkelveg 2, om Vatne og Hogstad til Høle og derfrå langs sjøen til Lauvvik (25 km). Den nasjonale ruta går med båt til Lysebotn, derfrå om Valle i Setesdal til Telemark.

Me laga vår eiga rute, me tok ferja til Oanes saman med tyskarar, nederlendarar og andre turistar. Ferja tok 10 min., og etter Oanes var det to alternativ: Gamle eller nye riksveg 13. Den gamle riksvegen går langs fjorden i retning Idse til Jørpeland og er 35 km lang. Den nye går forbi brua til Forsand, om Høllesli og rett over fjellet til Jørpeland. Denne er 25 km lang. Me frykta at turen på gamlevegen kunne gjere heile turen vel lang, over 8 mil, og valde derfor den nye. Når det er ein ferjestrekning i nærleiken, kjem dei fleste bilane i klumpar, så trafikken var ikkje så sjenerande, men det var god stigning/ bratt utfor etterpå (Han der var oppe i over 60 km/t) og fleire tunnellar, som ikkje er så stas med sykkel utan lykt. Derfor lurer eg på om det hadde vore kjekkare å ta det andre alternativet. - Det kan vi gjere ein annan gong.

Gamlevegen er blitt sykkelsti ved Jørpeland. Herleg!

Då me nærma oss Jørpeland, fann me ein sykkelsti på venstre side av vegen som nok var "gamlevegen". Det var freden å sykle der, i forhold til hovudvegen utan sykkelsti. - Jørpeland viste godsida, men mellom Jørpeland og Tau var det også strekk utan sykkelsti. - Det skal visst bli det når Ryfast-tunnellane blir bygde, men aksjonistar hadde hengt opp skilt med "Gi oss sykkelsti nå!" - Og eg forstår dei.

Frå Tau tok me ferja til Stavanger, kikka litt på livet og cruiseskipet Queen Mary der, før me tok vegen langs sjøen/dobbelsporet heim.  Mange hadde funne vegen ut på gang- og sykkelvegen, men ikkje så mange eg hadde trudd. Siste stopp i Vågen på Sandnes, før oppstigninga til Austrått, som var noko tyngre enn vanleg med sju mil på sykkel bak oss.

Rast ved dobbelsporet langs Gandsfjorden

Vakkert og variert i Sandnes aust. 47 km

Kjempeflott tur i austre del av Sandnes:

Frå Austrått via Sviland - Søredalen - Hommeland - Høle - Ims - Hogstad - Vatne og til Austrått igjen. Ruta ligg på Bikemap med namnet Søredalen - Høle.

Ruta er god trafikkmessig, første del til Sviland og siste del frå Hogstad på sykkelsti, resten på lite trafikkerte vegar. Det geniale var å ta gjennom Søredalen frå Sviland og ikkje gjennom den meir trafikkerte Noredalen. Det blei meir stigning og noko lengre enn alternativet, men herleg lite trafikk.

Grønt og vakkert i juni: Tiriltunge, hundekjeks, smørblom, lupin, prestekrage, blåklokke m.m. i vegkanten. Traktorar i ferd med å lage rundballar (trass i at det var første pinsedag), ganske mange bubilar, men dagen etter Nordsjørittet var det få syklistar å sjå. 

Sykkel og jernbane

Dagens tema blei jernbane

1. Vi sykla den herlege nye ruta langs dobbelsporet frå Lura til Stavanger (sjå eige innlegg). Vind frå sør gjorde det veldig lett.

2. For å sleppe motvind, tok me syklane på toget til Bryne. Heldigvis kom me ikkje i sykkelkø på toget. Tidlegare i veka las me om at syklistar som skulle trene til Nordsjørittet måtte bruke bil til Egersund, det blei for mange syklar på toget! God logikk: Kven skal så kjøre bilen tilbake! - Og dumt i vår verden når både kollektivtrafikk og sykling bør stimulerast. - Men me og syklane våre kom med denne dagen.

3. Frå Bryne sykla me til Orstad og innom han Elkjøp. Han tipsa oss om ei herleg, ny rute: Frå Håbakken inn i Kalbergskogen og nedover mot Figgjoelva og den nedlagde Ålgårdbanen (Del av trase for Garborgriket rundt). Me sykla der oppover langs den gamle banen til skytebanen og kom ut på E36 ved Bråstein. Tenk der har det vore ein tversforbindelse mellom Sandnes, Time og Klepp heile tida, for syklistar vel å merke.

Ålgårdbanen skulle gå frå Ganddal til Helleland, kor han skulle møte Flekkefjordbanen. Første etappe blei bygd i tidsromet 1921 til 1924, og i 1955 var det stopp ved: Holane, Vagle, Foss-Eikeland, Kalberg, Bråstein, Figgjo Fajanse, Figgjo fabrikker og Ålgård. Det var ti daglege avgangar kvar veg. Den må ha vore viktig for dei som arbeidde på Foss-Eikeland Figgjo, før bilen var vanleg. - Prisdumping på buss konkurrerte ut persontrafikken i 1955, men godstrafikk var det heilt til 1988. På Figgjo er jernbanetraseen broten fordi brua over vegen er borte, men nå har dei vore finslege med sporet i arbeidet med den nye brua på Foss-Eikeland.

I England hadde dei laga god sykkelveg i staden for jernbane, sjå Cinder Trail. Her låg skinnane ennå, men på sida var det grei sti å sykle på. Men han står ikkje på sykkelkartet for Sandnes. Det burde han

.

Rundt med Bersagel 44 km (Frå Austrått)

 Jødestad. Legg merke til intakte steingardar langs vegen.

Ei litt lang rute som er fin å sykle, er denne ruta som går i austre del av Sandnes kommune.

Veldig variert, litt krevjande fordi ho er kupert, og veldig kjekk. Vi startar i by, syklar langs trafikkert veg på sykkelsti mot Hommersåk, sjå eige innlegg om den. Før Hommersåk svingar vi av retning Li. Her er det fredelegare, og du får fin utsikt i retning Ryfylke. Landskapet er åpent og fritt, med fine gardar. Lurer på om dei som bur der set pris på den storslåtte utsikta! (Første mil er unnagjort)

Kvitveis

Det ber så ned mot sjøen, og til Hommersåk, med butikkar, kafe og to kyrkjer. Så tar vi av retning Bersagel, vi kjem inn i idyll og hytteland. Vegen er smal, utan sykkelsti, men det er lite trafikk. Herleg!

Men også ein del bratte bakkar, så det blir god trening. Kvitveis i bakkane, blømande frukttre og rød Rhododendron gjer turen ekstra flott om våren. (Milpause 2, ned mot sjøen i Eltervåg.) Denne delen av Sandnes kommune er ein smak av Ryfylke og øyane utover.

Etter Bersagel, som ennå har trekk av "gamle dagar" med hus med glassveranda like ut i vegen, svingar ruta vår innover Lutsivassdraget: Vi får landskap nr. 4 på turen: Ferskvann/fjellandskap. Framleis idyll og hytter, forbi Horve og Fløysvik, (milpause 3) før vi kjem inn på den velkjende vegen mellom Sandnes og Hommersåk, brei veg, mange bilar og sykkelsti igjen. Milpause 4 på Vatne. Me er i tettbygde strok igjen.

Sandvedparken

Også på dagens tur var vi innom Sandvedparken, sykla sørover i dag, fordi det var vind frå søraust, og då var det fint å sykle i den skjerma parken. Når vi syklar på den smale stien i parken, må vi sykle seint, for det er alltid turgjengarar der søndagar. Men eit lite kling med bjella er det som skal til for å få fotgjengarane til å lage veg for oss, det går bra.

Sandvedparken er verkeleg ei perle i allslags ver. I dag var det høg vannstand i Storaånå og nydelege haustfargar på trea. Eg visste at noko av parken hadde vore planteskole ein gong, og at min onkel Enevald i Åsedalen, nå over 90, hadde vore med på dugnad, men kva er eigentleg historien til den 3,5 m lange parken, ikkje 800 m, slik det står i Wikipedia.

Tidleg på 1900-talet var det parkanlegg noko som heitte Sandved hagebrukskole på garden Sandved, sjå kart. Kommunen (då Høyland kommune) leigde denne parken frå 1932, men kjøpte han seinare. Det vi i dag kallar Sandvedparken består eigentleg av den opprinnelege parken og seks til: Skeianeparken, Brueland-, Skei-, Sørbø-, Åse- og Lundeparken og strekker seg frå den gamle jernbanestasjonen på Sandnes til Ganddal stasjon, langs Storaånå. Dei sju parkane skal eigentleg heite Gandsparkane, men det er det vel få som veit. Onkel Enevald var saman med Guttorm Skårland og andre frivillige med på å lage eit fint anlegg ved Mølledammen, dammen heitte det på grunn av mølla som låg der. Ved mølla låg tidlegare Åse havremølle og Åse møbel, nå laga dei ein fin del av parken med ei bru og ein liten foss.


Det var framsynte folk som planla dette lange parkdraget. I 1962 vann landskapsarkitektane Fosså og Skjold konkurranse om korleis han skulle sjå ut, og hovudarbeidet med parken blei gjort rundt 1970. Mange bur inntil parken, og har glede av han kvar dag.  Stadig nye hus veks opp langs elva, og nokre stader er parken svært smal. Klart det blir konflikter mellom grunneigarar og det offentlege om arealbruken. Kvadratmetrane er verdifulle!

Planen nå er å åpne ånå (elva) i nord heilt til Gandsfjorden, og gjere delar av steinørkenen i Vågsområdet om til park. Første steg i så måte er det som er gjort utanfor Vågen vidaregåande skole, men det er klart vanskar for kommunen å få grunneigarane til å avstå grunn til park i staden for å byggje bustader. Varner og Felleskjøpet er ikkje heilt med på å spleise på park. Men sjå på biletet under frå Stavanger Aftenblad 22.10.2007, vil det ikkje kunne bli flott! Nå er det snart slutt på 2010, og ånå er i ferd med å bli opna ved skolen. Elles er det stillstand. Felleskjøpet nekta til og med dei som arbeider med elveløpet nå å gjere arbeidet frå deira eigedom - siloane.

STORÅNAPARKEN: Sentrumsplanen for Sandnes foreslår følgende i Vågen: Ei stor bølgende grasslette hvor silobygget er i dag, kalt Fjerå (1) åpner området ut mot fjorden. Lengre sørover planlegges Bylunden (2), og i stedet for å ende kanalen her, åpnes Storåna videre oppover, forbi et høyhus (3), og parkering på tre plan under parken (4). I Vågsgjerd-området (5) er parken smalere, men i Nye Laksen (6) utvides den igjen. Den gamle badeplassen gjenoppstår og danner linken til Sandvedparken på andre siden av jernbanen.